Վիլֆրիդը հստակ էր. «Չգիտեմ՝ նա արդյոք իդեալական թեկնածուն է, բայց շատ լավ կլիներ», – խոստովանեց նա՝ խոսելով Զիզուին «եռագույնների» (Les Bleus) գլխավոր մարզչի դերում տեսնելու հնարավորության մասին։ Նա դա որպես կայացած փաստ չի ընդունում, բայց և չի թաքցնում, որ այդ տարբերակն իրեն դուր է գալիս։

Նախքան ապագային նայելը, նա ցանկացավ կանգ առնել ներկայի և Դեշամի կերպարի վրա։ «Մենք դա հետո կհասկանանք, բայց շատ դժվար է լինելու փոխարինել Դեշամին», – կանխատեսեց նա և զգուշացրեց. «Այսօր մենք նրա մեջ շատ թերություններ կգտնենք, բայց հենց նա հեռանա, բազմաթիվ առավելություններ կտեսնենք։ Չպետք է մոռանալ նրա կատարած աշխատանքը և այն տիտղոսները, որ նա թողնելու է։ Իսկ եթե դա Զիդանն է, բոլորս էլ երջանիկ կլինենք»։

Եթե փոխարինումը հաստատվի, ապա այն կրկին կմիավորի Ֆրանսիայի հավաքականի և «Յուվենտուսի» երկու նախկին թիմակիցներին։ Սա մի փոփոխություն է, որը Ֆրանսիայում համարվում է գրեթե բնական գործընթաց։

Զիդանի հարցում Մբապեների տանը կասկածներ չկան։ Կա ընդհանուր պատմություն։ «Կա ընդհանուր անցյալ», – հիշեցրեց Վիլֆրիդը՝ ակնարկելով այն փորձաշրջանը, որը Կիլիանն անցել էր Մադրիդի «Ռեալում», երբ դեռ երեխա էր, իսկ Զիդանը դեռ ակումբում էր։ Նա մանրամասն նկարագրեց այդ տեսարանը. «Կիլիանը, երբ փոքր էր, շատ կատակասեր էր, շատ աղմկում էր։ Բայց երբ այդ պարոնը բացեց դուռը... հոպ (ցույց է տալիս բերանը փակելու ժեստը), այլևս ոչ մի ձայն դուրս չեկավ»։

Այդ օրը փոխվեց նաև նրա ընկալումը։ «Ես նրան այլ կերպ տեսա։ Նա իսկապես հրաշալի մարդ է։ Երբեմն ինչ-որ մեկին չես ճանաչում, տեսնում ես հեռուստացույցով և ծանոթանալիս կարող ես հիասթափվել։ Նրա դեպքում ամեն ինչ հակառակն է»։ Եվ այդ հիշողությամբ՝ դուռը բացվելիս լռած երեխայի պատկերով, Վիլֆրիդ Մբապեն ակնարկեց, թե ինչպես է պատկերացնում  հավաքականի ապագան։

Իր որդու մանկության մասին

«Մարդիկ չեն գիտակցում։ Հիմա, երբ նա արդեն «պատրաստի արտադրանք» է, մարդիկ ինձ ասում են՝ «նա դարձավ այսպիսին» կամ «դարձավ այնպիսին»։ Բայց կան այնքան բաներ, որոնք մենք չունենք։ Այնքան բաներ, որոնք երբեք չենք կարող փոխարինել։ Կան այնքան բաներ, որոնք մենք չարեցինք։ Այսօր ո՞վ է երեխա ունենում, որպեսզի նրան «կորցնի» 13 կամ 14 տարեկանում։ Ոչ ոք։ Չկա մի հայր կամ մայր, որը կարող է ասել՝ «Իմ որդին տնից հեռացավ 13 տարեկանում և երբեք չվերադարձավ»։ Դա այն է, ինչ պատահեց մեզ հետ։