Թե՛ Կիլիան Մբապեն, թե՛ Ջուդ Բելինգեմը պատրաստվում են վերադառնալ Վալդեբեբասի առօրյային և միանալ Ալվարո Արբելոայի գլխավորած թիմի աշխատանքներին: Նրանք չեն հասցնի մասնակցել Մանչեսթեր Սիթիի դեմ առաջին խաղին, և իրական ու հնարավոր նպատակն այն է, որ նրանք պատրաստ լինեն մարտի 17-ին կայանալիք «Էթիհադի» պատասխան հանդիպմանը:

Ֆրանսիացին և անգլիացին Իսպանիայից դուրս են փնտրել ախտորոշում և վերականգնողական ծրագիր, ինչպես նախկինում բազմիցս արել են մադրիդյան թիմի տարբեր խաղացողներ: Սա ուշադրություն է գրավում, քանի որ խոսքը թիմի երկու առաջատարների մասին է, սակայն վերջին տարիներին Վալդեբեբասում վերականգնողական գործընթացների հաստատված կարգում սա սովորական երևույթ է դարձել:

Արդեն երկար ժամանակ է, ինչ «Ռեալ Մադրիդը» հստակեցրել է՝ վնասվածքների վերականգնումն անցնում է լավագույն ախտորոշումը գտնելու և այնպիսի բուժման միջոցով, որի հետ ֆուտբոլիստներն իրենց ավելի վստահ են զգում: Սա նորություն չէ, չնայած նրան, որ փորձ է արվել մեծ աղմուկ բարձրացնել Մբապեի և Բելինգեմի ճամփորդությունների շուրջ:

Այն, ինչ արդեն լիովին բացառված է, երկու խաղացողներից որևէ մեկի մասնակցությունն է 1/8 եզրափակչի առաջին խաղին, որը կայանալու է հաջորդ չորեքշաբթի «Մանչեսթեր Սիթիի» դեմ: Մբապեի ձախ ծունկը լավ է արձագանքում բուժմանը, և թեև ինչ-որ պահի մտածում էին հաջորդ չորեքշաբթի վերադառնալու հնարավորության մասին, իրականությունը հուշում է, որ ավելի լավ է պահպանել ի սկզբանե նշված երեք շաբաթվա ժամկետը:

Ղեկավարները, մարզիչները և հենց ինքը՝ Մբապեն, համամիտ են, որ միակ նպատակը պետք է լինի վերջնականապես մոռանալ այն ցավերը, որոնք հայտնվել էին դեկտեմբերի առաջին օրերին և դեռ թույլ չեն տալիս նրան խաղալ լիարժեք ուժով: Վստահությունը ֆրանսիացի բժիշկ Բերտրան Սոնների-Կոտտեի նկատմամբ բացարձակ է. նրա բուժած պացիենտների պատմությունը դրա լավագույն վկայությունն է: