Լիսաբոնում «Ռեալի» վատ նորությունների և բացասական զգացողությունների կուտակումը չափազանց մեծ էր։ Լավագույն ութնյակից դուրս մնալուն և բաց թողած չորս գոլերին գումարվեց նաև երկու կարևոր խաղացողների կորուստը փլեյ-օֆֆի առաջին հանդիպման համար՝ խոսքը Ռոդրիգոյի և Կարերասի մասին է։

Բրազիլացի հարձակվողը ներողություն խնդրել «Արքայական ակումբի» երկրպագուներից՝ իր սոցիալական ցանցերի միջոցով․ «Երեկ ես տրվեցի պահի ազդեցությանը՝ բողոքելով ժամանակի ձգձգումների դեմ։ Դա իմ ոճը չէ։ Ես երբեք չէի հեռացվել դաշտից «Ռեալում» խաղալիս և գիտակցում եմ հետևանքները։

Ներողություն եմ խնդրում երկրպագուներից, ակումբից, թիմակիցներիցս և մարզչից։ Մենք կշարունակենք միասնական մնալ և պայքարել այս զինանշանի ու այս Չեմպիոնների լիգայի համար»,- գրել է նա։

Հանդիպման մրցավար Դավիդե Մասան նրան ընդամենը մեկ րոպեի ընթացքում երկու դեղին քարտ ցույց տվեց այն բանից հետո, երբ Մբապեի՝ հաշիվը 3։3 դարձնող գոլը չեղարկվեց։ Պատճառը Տրուբինի կողմից գնդակը խաղի մեջ մտցնելուն ապօրինի կերպով խոչընդոտելն էր։ Չնայած դրվագը գրեթե կասկածներ չէր հարուցում, բրազիլացու համառ բողոքներն ավարտվեցին երկու դեղին քարտով։

Եթե անակնկալներ չլինեն, ՈՒԵՖԱ-ն «Մադրիդի» յուրաքանչյուր խաղացողի կպատժի մեկխաղյա որակազրկմամբ։ Ռոդրիգոն, ով Մաստանտուոնոյի հետ պայքարում է աջ եզրում տեղ ունենալու համար, այսպիսով դուրս է մնում Արբելոայի պլաններից այն խաղի համար, որը թիմը պետք է անցկացնի «Բուդյո Գլիմտի» կամ «Բենֆիկայի» հարկի տակ։