Մադրիդի «Ռեալի» աստղը առաջատարն է գոլերով և արդյունավետությամբ, մինչդեռ «Բարսելոնան» հարձակման ծանրությունը բաշխում է հինգ խաղացողների միջև, որոնք ընդգրկված են Լա լիգայի թոփ-10-ում։

Երբեմն ֆուտբոլը կարելի է ամփոփել մեկ պատկերով, մեկ թվով կամ մեկ անունով։ Եվ այս մրցաշրջանը Մադրիդի «Ռեալի» համար կրում է Կիլիան Մբապեի անջնջելի կնիքը։

«Կախվածություն ինձնի՞ց։ Դա հիմարություն է,  պետք չէ ասել «կախվածություն», այլ պետք է ասել, որ ես պատասխանատու եմ, եթե չենք հաղթել, որովհետև ես պետք է գոլեր խփեմ»։

Այսպես հաստատակամ արտահայտվեց ֆրանսիացի հարձակվողը «Օլիմպիակոսի» դեմ խաղում չորս գոլ խփելուց հետո։ Սա առաջնորդին բնորոշ ուղերձ էր, բայց միևնույն ժամանակ՝ իրականությունից մի փոքր հեռու։ Չնայած թիմակիցներին պաշտպանելուն ուղղված նրա խոսքերին, թվերը չեն ստում։

Մբապեն և «Մադրիդի» կախվածությունը

Մբապեն խփել է «Ռեալի» բոլոր մրցաշարերում գրանցած 79 գոլերից 38-ը։ Լա Լիգայում պատկերն ավելի ցայտուն է. թիմի 49 գոլերից 23-ը նրա հաշվին են (ընդհանուրի 55%-ը)։ «Սերուցքայինների» հարձակողական ուժի կեսից ավելին սկսվում կամ ավարտվում է նրա ոտքերի մոտ։ Դրան պետք է գումարել նաև չորս գոլային փոխանցում։ Իսպանիայի առաջնությունում նա աչքի է ընկնում գոլային մասնակցությամբ յուրաքանչյուր 72 րոպեն մեկ։ Նա առաջինն է «գոլ+ասիստ» աղյուսակում և «Մադրիդի» միակ ներկայացուցիչն է թոփ-10-ում։

Զարմանալի հակապատկեր

Նույնիսկ Կրիշտիանու Ռոնալդուի ամենաարդյունավետ տարիներին գոլերի նման կենտրոնացում մեկ խաղացողի ձեռքում չէր եղել։

Միևնույն ժամանակ, «Բարսելոնան» առաջատար է 63 գոլով և ունի շատ ավելի հավասարաչափ բաշխվածություն։ Նրանց հինգ ֆուտբոլիստներ ընդգրկված են հարձակման գծի լավագույն տասնյակում.

Լամին Յամալ․ 10 գոլ, 8 ասիստ

Ֆերան Տորես․ 13 մասնակցություն

Դանի Օլմո․ 12 մասնակցություն

Լևանդովսկի և Ռաֆինյա․ 11-ական մասնակցություն (չնայած վնասվածքների պատճառով քիչ խաղերին)։

Այսպիսով, «Բարսան» հարվածում է թիմային խաղի և ռեսուրսների բազմազանության շնորհիվ։ Մադրիդի «Ռեալի» հաջորդ խաղացողին գտնելու համար պետք է իջնել թոփ-10-ից դուրս, որտեղ Վինիսիուսն է։ Բրազիլացին ունի 11 գոլային մասնակցություն, սակայն նրա արդյունավետությունը (գոլ կամ ասիստ 152 րոպեն մեկ) մտահոգիչ է մի ֆուտբոլիստի համար, ով նախորդ մրցաշրջանում համարվում էր աշխարհի ամենավճռորոշ խաղացողը։

Հարցը կախվածության մեջ չէ

Պատկերը պարզ է. մի թիմ, որը հենվում է իր աստղի բացառիկ տաղանդի վրա, ընդդեմ մի այլ թիմի, որն իր ուժը գտնում է շատերի համախմբվածության մեջ։ Ուստի հարցն այն չէ, թե արդյոք կախվածություն կա, այլ այն՝ կկարողանա՞ Մբապեն պահել այս տեմպը մինչև վերջ, որովհետև Լա լիգայի համար պայքարում այսօր տեսարանն ակնհայտ է՝ Մբապեն բոլորի դեմ։