Կուրտուան և Մբապեն մնում են միակ փրկօղակները «կարմիր կոդի» մեջ գտնվող Մադրիդում:

Լիսաբոնում նրանք նորից բացառություն էին: Կիլիանը՝ երկու գոլի հեղինակ և թիմի միակ «ժանիքը», Տիբոն՝ 7 սեյվերի պատասխանատուն, որոնցից մի քանիսը հրաշքի էին հավասար: «Մադրիդը» ապրում է «կարմիր կոդի» տակ: Հստակ ախտորոշում չկա, շատ մասեր խափանված են, բայց գոնե այս երկուսը չեն դավաճանում․ ոսկե բացառություններ:

Մբապեն շարունակում է մնալ Մբապե: Որովհետև ռմբարկուները չեն լացում, ռմբարկուները գոլեր են խփում՝ նույնիսկ այն խաղերում, որոնք այնքան էլ փայլուն չեն: Այդպես եղավ «Վիլյառեալի» դեմ՝ դուբլ, այդպես եղավ Լիսաբոնում՝ դուբլ:

Առաջինը՝ գլխի հարվածով այն նույն դարպասին, որտեղ Սերխիո Ռամոսը խփեց իր հայտնի գոլը 10-րդ գավաթի ժամանակ: Երկրորդը՝ աջ ոտքի հարվածով՝ տուգանային հրապարակի կենտրոնից: Այնպիսի հարվածներ, որոնք հեշտ են թվում, բայց ամենևին այդպիսին չեն:

Գիշատչի ռենտգենը

Մբապեն այս մրցաշրջանում արդեն 36 գոլ ունի: Նա մոտենում է նախորդ տարվա ցուցանիշին (44), իսկ փետրվարը դեռ չի էլ սկսվել: Նրա տեմպը տպավորիչ է՝ միջինը 1,24 գոլ մեկ խաղում: Հաշվի առնելով, որ «Մադրիդը» դեռ կարող է անցկացնել ևս 26 խաղ՝ նա կարող է հասնել 68 գոլի: Դա պարզապես ֆանտաստիկա է: Մի թիվ, որը պատմության նոր էջ կգրի. նա կգերազանցի Կրիշտիանու Ռոնալդուի լավագույն տարին «Ռեալում» (61 գոլ, 2014/15 մրցաշրջանում):

Լիսաբոնում, նույնիսկ չունենալով իր լավագույն անհատական խաղը, նա ամենաշատն էր հարվածում (4), ամենաշատը՝ դեպի դարպասը (2 հարված, 100% արդյունավետություն), երկրորդն էր ստեղծած պահերով (3), առաջինը՝ փոխանցումներով հարձակման գոտում (22) և առաջինը՝ դրիբլինգով (4): Նա միաժամանակ ամենուր էր:

Պողպատե հսկան

Ինչպես և Կուրտուան: Մարդ, ով հետ է մղում հնարավորը, իսկ երբեմն էլ՝ անհնարինը: Բայց նա էլ չի կարող ամեն ինչ միայնակ անել: Լիսաբոնում նա 7 սեյվ կատարեց: Դա մրցաշրջանի երկրորդ ամենածանր գիշերն էր (զիջում է միայն «Էնֆիլդին»՝ 8 սեյվ): 7 սեյվ մի խաղում, որտեղ թիմը 4 գոլ բաց թողեց: Սա շատ բան է ասում պաշտպանության «անցքերի» մասին: Առանց նրա... արյունահոսությունը կարող էր աղետալի լինել:

Այս Չեմպիոնների լիգայում նա երկրորդն է սեյվերի քանակով (41): Նրանից առաջ միայն «Բուդյո-Գլիմտի» դարպասապահն է: Կուրտուան Չեմպիոնների լիգայում միջինը կատարում է գրեթե 6 սեյվ ամեն խաղում (5,8): Դա չափազանց շատ է «Ռեալի» պես թիմի համար: Եվ նա շարունակում է պահել մակարդակը՝ չնայած փոթորկին: Նա և Մբապեն այս «Մադրիդի» ոսկե բացառություններն են: