Պեդրո Մորատայի կարծիքը

«Ռեալ Մադրիդ» ֆուտբոլային ակումբն արձագանքել է Deloitte-ի հրապարակմանը, որի համաձայն՝ այն աշխարհի ամենաշատ եկամուտ ունեցող ակումբն է՝ 24/25 մրցաշրջանում 1 միլիարդ 161 միլիոն եվրո եկամուտով: Սա հավաստի տվյալ է, որը ցույց է տալիս ակումբի առևտրային հզորությունը և անկասկած հպարտանալու առիթ է: Այս՝ 25/26 մրցաշրջանում, ըստ բյուջեի, այդ թիվը էլ ավելի կբարձրանա՝ հասնելով 1,248 միլիարդի։

Այն, ինչ Deloitte-ը չի ասի, և «Ռեալ Մադրիդը» չի հրապարակի, ծախսերի բաժինն է: Որովհետև եթե դու ունես աշխարհի թիվ 1 եկամուտները, բայց քո ծախսերը նույնպես այդպիսին են, ապա պատկերն արդեն այդքան էլ գեղեցիկ չէ:

Ես կներկայացնեմ երկու կարևոր տվյալ՝ վերցված ակումբի արդեն փակված և պաշտոնական հաշիվներից՝ 24/25 մրցաշրջանի դրությամբ (2025թ. հունիսի 30-ի տվյալներով)․

«Ռեալ Մադրիդը» վերջին 3 մրցաշրջանների ընթացքում ստիպված է եղել դիմել այսպես կոչված «լծակների» (palancas)՝ կանխավճարային եկամուտների և ակտիվների վաղաժամ վաճառքի արտակարգ գործողությունների, քանի որ նրա տարեկան սովորական (ընթացիկ) ծախսերը գերազանցում են սովորական եկամուտները։ Առանց այդ «լծակների» «Ռեալ Մադրիդը» ամեն մրցաշրջան վնասով կփակեր, եթե չկրճատեր խաղացողների, կառուցվածքի և ֆինանսական ծախսերի բյուջեն: Իսկ «Ռեալ Մադրիդը» չի ցանկանում կորցնել մարզական պոտենցիալը:

«Ռեալ Մադրիդի» ծախսերի ավելի քան կեսը (61%) ծախսվում է այնպիսի բաների վրա, որոնք կապ չունեն առաջին թիմի հետ։

Ակումբի էության՝ առաջին թիմի վրա ներդրվում է ընդհանուր ծախսերի միայն 39%-ը:

Ընդհանուր եկամուտներ (24/25 մրցաշրջան)․ 1,193 միլիոն եվրո

Ծախսեր առաջին թիմի վրա․ 465 միլիոն եվրո (39%)

Ծախսեր առաջին թիմ + Պահեստային թիմ + Բասկետբոլ․ 539 միլիոն եվրո (45%)

Նույնիսկ եթե ունես հիանալի մարզադաշտ և եկամուտներով աշխարհի չեմպիոն ես, ի՞նչ իմաստ ունի ֆուտբոլային ակումբի համար, որ իր եկամուտների միայն 39%-ն է ծախսում առաջին թիմի վրա, երբ ակումբի հիմնական նպատակը խաղեր ու տիտղոսներ շահելն է, ինչը ձեռք է բերվում հենց առաջին թիմի միջոցով:

Այժմ կարելի է թարմացնել երկու գրանդների՝ «Ռեալի» և «Բարսայի» տնտեսական իրականությունը, թե ինչպիսին կլիներ այն առանց լծակների:

«Ռեալ Մադրիդը»՝ լծակներով և առանց լծակների

Ըստ ակումբի պաշտոնական հաշվետվությունների, «Ռեալը» վերջին հինգ մրցաշրջանների ընթացքում (20/21-ից մինչև 24/25) ստացել է +65,5 միլիոն եվրոյի զուտ շահույթ (հարկերից հետո)․

20/21 մրցաշրջան: +0,9 մլն

21/22 մրցաշրջան: +12,9 մլն

22/23 մրցաշրջան: +11,8 մլն (Այս մրցաշրջանում ստորագրվեց Sixth Street-ի հետ «լծակը»՝ 360 մլն եկամուտ):

23/24 մրցաշրջան: +15,6 մլն (Բայց սա շնորհիվ 75 միլիոնանոց լծակի: Առանց դրա կլիներ -54 մլն վնաս):

24/25 մրցաշրջան: +24,3 մլն (Շնորհիվ 102 միլիոնի երկու լծակների: Առանց դրանց ակումբը կկորցներ մոտ -69 միլիոն եվրո):

Վերջին 5 մրցաշրջաններում «Ռեալը» կիրառել է մոտ 540 միլիոն եվրոյի լծակներ.

360 մլն եվրո՝ «Բեռնաբեուի» նոր բիզնեսների վաճառքից (Sixth Street):

75 մլն եվրո՝ VIP օթյակների («նստատեղերի անձնական լիցենզիաների») կանխավճարային վաճառք:

24/25 մրցաշրջանի երկու լծակներ․

Լծակ 1: VIP օթյակների վաճառք (մոտավորապես 60 մլն եվրո):

Լծակ 2: Աշխարհի ակումբային առաջնությունից ստացված եկամտի 50%-ը (42 մլն եվրո), ինչը սովորական տարեկան եկամուտ չէ:

Եթե հանենք հարկերը (25%) և այս լծակները, «Ռեալ Մադրիդը» վերջին հինգ տարում կունենար 337,2 միլիոն եվրոյի կորուստ: Նույնիսկ եթե Աշխարհի ակումբային առաջնությունը չհամարենք լծակ, կորուստը կկազմեր 305,7 միլիոն եվրո:

Եզրակացություն

Եթե Ֆլորենտինո Պերեսը չօգտագործեր իր լծակները, ինչպես դա անում է «Բարսան», «Ռեալը» կունենար առնվազն 300 միլիոն եվրոյի վնաս: Տարբերությունն այն է, որ «Ռեալի» լծակները իրական են, վստահելի ընկերությունների հետ և առանց խարդախությունների:

Սուպերլիգայի անհրաժեշտությունը և ակումբի 10%-ի սեփականաշնորհումը

Պատահական չէ Ֆլորենտինոյի ջանքերը՝ սեփականաշնորհել ակումբի 10%-ը (կամ ավելին)՝ առանց այն բաժնետիրական ընկերության վերածելու: Սա արվում է 1 միլիարդ եվրո ներգրավելու համար, քանի որ ակումբը ամեն մրցաշրջան գնում է սահմանագծով՝ հաշիվները փակելու համար: Հենց սա է պատճառը, որ ակումբը չի գնել անհրաժեշտ հենակետային կիսապաշտպանին, բայց գնել է Մաստանտուոնոյի նման խաղացողների, ինչը ֆինանսապես ռիսկային էր:

Այս ամենը բարդանում է նրանով, որ «Բեռնաբեուի» վերակառուցումը նախատեսված 575 միլիոնի փոխարեն արժեցել է 1 միլիարդ 347 միլիոն, իսկ համերգներից ստացվող եկամուտները ներկայումս արգելափակված են դատական կարգով:

Ֆլորենտինոյին թթվածնի պես անհրաժեշտ են․

10% կամ ավելիի սեփականաշնորհումը:

Սուպերլիգան և դրա եկամուտները:

Աշխարհի ակումբային առաջնությունը (ամեն տարի):

Կամ խաղացողների վաճառք և ծախսերի կրճատում:

Հեղինակը նաև զարմանք է հայտնում, թե ինչու է Ֆլորենտինոն նման ֆինանսական վիճակում օգնել «Բարսային» (2022-ի ամռանը)՝ հեշտացնելով նրանց համար 517 միլիոն եվրոյի հասանելիությունը, որպեսզի Լապորտան մնա Սուպերլիգայում, մինչդեռ «Բարսան» ուժեղացավ և սկսեց տիտղոսներ խլել «Ռեալից»: