Գիտակցելով ձախ թևի թուլությունը, որտեղ Բելինգեմն ու Վինիսիուսը, ինչպես և սպասվում էր, առանց օգնության թողեցին Կարերասին (վերջինս իսկական չարչարանքների միջով անցավ), Մոուրինյոն այդ ուղղությամբ կենտրոնացրեց Պրեստիանիին, Դեդիչին և նույնիսկ Սուդակովին՝ առաջացնելով անկազմակերպ նահանջներ և խուճապային տեսարաններ տուգանային հրապարակում։

Բելինգեմն ու Վինիսիուսը, որոնք կասկածվում են Խաբի Ալոնսոյի դեմ դուրս գալու մեջ (ինչի համար էլ արժանացան «Բեռնաբեուի» սուլոցներին), այս նոր փուլում պարտավոր էին ավելի մեծ ջանքեր գործադրել, սակայն Լիսաբոնում նրանք դա հաստատ չարեցին։

Արբելոայի հիմնական խնդիրն է լինելու վերջնականապես սթափեցնել այս երկուսին։ «Ռեալն» ունի չորս բացառիկ խաղացող՝ Կուրտուա, Մբապե, Բելինգեմ և Վինիսիուս, որոնցից առաջին երկուսը գերազանցություն են դրսևորում թե՛ դաշտում, թե՛ մամուլի ասուլիսների ժամանակ, մյուս երկուսը՝ ոչ։ Բելինգեմը նույնիսկ չի մոտեցել այն մակարդակին, որը ցուցադրում էր ակումբում իր առաջին չորս ամիսների ընթացքում, իսկ Վինիսիուսը նման է տանգոյի. «Այսօր՝ երդում, վաղը՝ դավաճանություն»։

Արբելոայի այս «Ռեալի» արդյունքները միայն այն ժամանակ իրապես լավը կլինեն, երբ այդ երկուսը սկսեն գործել, այդ իսկ պատճառով ինձ հիասթափեցրեց այն անտերության մատնված վիճակը, որում նրանք թողեցին Կարերասին։ Հնարավոր է՝ նրանք չափից դուրս ինքնավստահ են դարձել նախագահի կողմից չափազանց պաշտպանված լինելու պատճառով։

Տարիներ առաջ Ֆլորենտինո Պերեսը խոստովանեց, որ չափից շատ էր երես տվել իր «գալակտիկոսներին», վերադարձավ սխալներն ուղղելու մտադրությամբ, ինչը կատարեց բոլորի դեպքում, բացի Բեյլից, իսկ հիմա նորից վերադարձել է հին սովորությանը։

Փարիզի թռիչքի ընդհատումը («Ոսկե գնդակի» արարողությանը չմեկնելը) ինքնին աղետալի որոշում էր՝ վատագույն հետևանքներով Վինիսիուսի ինքնընկալման համար։ Ինչ վերաբերում է Բելինգեմին, նա Louis Vuitton-ի դեսպանն է, ունի սեփական ենթաբրենդը Adidas-ում (երկու ապրանքանիշերն էլ ակումբի հովանավորներն են) և սեփական հավելվածը։ Նրա կոմերցիոն արժեքը ռազմավարական է Ֆլորենտինոյի համար, և նա դա գիտի։

Սրանք երկու բարդ «քեյսեր» են Արբելոայի համար, ով արդեն ստիպված էր հանդուրժել Գյուլերի դժգոհ դեմքը, երբ փոխարինեց նրան հենց անկյունայինը խաղարկելուց առաջ և Մբապեին երկրորդ գոլի հարցում օգնելուց քիչ անց։

Չուամենին նույնպես հեռացավ վրդովված։ Ղեկավարը պետք է լինի նախևառաջ արդար, և եթե նա ցույց տա, որ փոխարինումների ժամանակ կան «անձեռնմխելիներ», նրա հեղինակությունը կխաթարվի։