Բժշկի վերադարձը «Ռեալ» պայմանավորված է վնասվածքների մտահոգիչ քանակով, որոնք թիմը կուտակել է անցյալ մրցաշրջանի (63) և ընթացիկ մրցաշրջանի (32) ընթացքում

Մադրիդի «Ռեալը» հունվարյան տրանսֆերային շուկայում գործուն քայլեր ձեռնարկեց, բայց ոչ թե թիմն ուժեղացնելու (թեև սա էլ է հարաբերական), այլ բժշկական անձնակազմը վերակազմավորելու համար։ Վնասվածքները շաբաթ առ շաբաթ թուլացնում են թիմը, և բացակայությունների հարցը «Արքայական ակումբում» դարձել է պետական նշանակության խնդիր։ Ֆիզիկական բազմաթիվ խնդիրների պատճառով առաջացած դժգոհությունը վաղուց էր հասունացել, և որոշում կայացվեց նոր «համալրում» կատարել։

Հեղինակավոր բժիշկ Նիկո Միհիչը վերադառնում է «Ռեալ Մադրիդ»՝ վերահսկելու առաջին թիմի բժիշկների աշխատանքը, որոնք շարունակում են մնալ Ֆելիպե Սեգուրայի ղեկավարության ներքո։ Կիրակի օրը COPE-ն հայտնեց Միհիչի վերադարձի մասին. մի քայլ, որով ակումբը ձգտում է բարելավել պրոֆեսիոնալ մարզիկների առողջության հետ կապված բոլոր գործոնները։ Թեև խորվաթ բժիշկը շարունակում էր կապված մնալ ակումբի հետ, այսուհետ նա կլինի «Ռեալ Մադրիդի» բոլոր բաժինների բժշկական վերահսկողը, ներառյալ առաջին թիմը, որի բժշկական ծառայությունները նա ղեկավարել է 2017-ից 2023 թվականներին։

95 ֆիզիկական խնդիր

Միհիչը վերադառնում է լուծելու այն 95 ֆիզիկական խնդիրները, որոնք «Մադրիդը» կրել է անցյալ մրցաշրջանից ի վեր։ Սա հետևանք է անցյալ մրցաշրջանի 63 և այս մրցաշրջանի 32 վնասվածքների։ Վնասվածքների այս քանակը ստիպել է թիմին բազմաթիվ դեպքերում մրցել իսկապես օրհասական վիճակում. օրինակ՝ անցյալ տարի եղել են պահեր, երբ թիմը մեկ խաղի համար ունեցել է մինչև 12 բացակա։

Անցյալ մրցաշրջանում 22 խաղացող այս կամ այն պահին հայտնվել է բուժկետում. միայն Մոդրիչն ու Գյուլերը չեն ունեցել ֆիզիկական որևէ խնդիր։

Այս մրցաշրջանում պատկերը չի փոխվել. մրցաշրջանի կեսին վնասվածքների ցուցանիշը գրեթե նույնն է, ինչ նախորդ տարի։ Մադրիդն արդեն ունի 32 վնասվածք (համեմատության համար՝ «Բարսելոնան» ունի 23, իսկ «Ատլետիկոն»՝ 21)։ Հատկապես ծանր էր հոկտեմբեր-դեկտեմբեր հատվածը, որտեղ գրանցված 25 վնասվածքները ստիպեցին թիմին վերջին 16 խաղերից 10-ում հանդես գալ 6 կամ ավելի բացականերով։

Յոթ «ցավոտ» դեպք

Մյուս մտահոգիչ փաստը որոշ ֆուտբոլիստների վնասվածքների կրկնվող բնույթն է։ Մոտ 25 հոգանոց կազմից յոթը 2025 թվականի ընթացքում մասնակցել են խաղերի միայն 50%-ին կամ ավելի քիչ։ Ահա այդ ֆուտբոլիստները.

• Միլիտաո (17 խաղ 67-ից – 26%)
• Ալաբա (18 խաղ 67-ից – 26%)
• Կարվախալ (9 խաղ 67-ից – 14%)
• Ռյուդիգեր (36 խաղ 67-ից – 53%)
• Կամավինգա (39 խաղ 67-ից – 57%)
• Տրենտ Ալեքսանդր-Առնոլդ (16 խաղ 31-ից – 51%)
• Մենդի (15 խաղ 67-ից – 23%)

Սա անկասկած լուրջ խոչընդոտ է թիմի հավակնոտ նպատակներին հասնելու ճանապարհին։