Այն ժամանակ, երբ «Ռեալ Մադրիդն» ապրում է իր պատմության ամենաբարդ շրջաններից մեկը, թիմին անհրաժեշտ են առաջնորդներ, և Դանի Կարվախալը, անկասկած, նրանցից մեկն է:

Նա ոչ միայն ուժեղագույն աջ պաշտպան է, այլև ավագ, ով ընդունակ է ոգեշնչել թիմին դժվարին պահերին և օգնել նրանց գտնել անհրաժեշտ քաջությունը: Նրա բացակայությունը զգացվում էր ինչպես խաղադաշտում, այնպես էլ դրանից դուրս, և նրա վերադարձին հանդերձարանում սպասում են մեծ անհամբերությամբ:

Սուրբծննդյան կարճ ընդմիջման ժամանակ, մինչ ֆուտբոլիստների մեծ մասը վայելում է հանգիստը մինչև դեկտեմբերի 29-ը, Կարվախալը շարունակում է վերականգնողական գործընթացը Վալդեբեբասում՝ լի վճռականությամբ պատրաստ լինելու 2026 թվականի առաջին խաղերին:

Հոկտեմբերի 27-ին աջ ծնկի արթրոսկոպիայից հետո վերականգնումը տևում է վեցից տասը շաբաթ: Դանիի նպատակն է վերադառնալ տարվա սկզբին, հատկապես հաշվի առնելով Իսպանիայի սուպերգավաթը, որտեղ կիսաեզրափակչում «Ռեալը» կմրցի «Ատլետիկոյի» հետ:

Խաբի Ալոնսոյի մտահոգությունը

Խաբի Ալոնսոն, գիտակցելով թիմի պաշտպանության խոցելիությունը, չի թաքցնում իր մտահոգությունը խաղացողներին հետապնդող վնասվածքների վերաբերյալ.

«Գործոնները շատ են: Միայն մեկ պատճառ չկա: Մեծ ծանրաբեռնվածության դեպքում վնասվածքների ռիսկն աճում է: Վերջերս տուժեց Միլիտաոն: Ե՛վ Տրենտը, և՛ Կարվախալը վնասվածք ունեն, իսկ Ֆեդեն այսօր չկարողացավ խաղալ: Պետք է հնարամտություն ցուցաբերել, և ես գնահատում եմ խաղացողների ջանքերը», – խոստովանել է մարզիչը:

Առաջնորդի գործոնը

Կարվախալի վերադարձը կարևոր է ոչ միայն տակտիկական տեսանկյունից. այն մեծ հուզական աջակցություն կլինի հանդերձարանի համար, որն ունի փորձառու և կամային առաջնորդների կարիք: Դանին օրինակ է երիտասարդ խաղացողների համար:

Այս պահին գլխավորը զգուշությունն է: Ակումբը նախընտրում է չռիսկի դիմել և Կարվախալին հնարավորություն տալ ամբողջությամբ վերականգնվելու: 

Այնուամենայնիվ, «Մադրիդում» դեռ կասկածներ կան՝ կհասցնի՞ նա պատրաստվել սուպերգավաթին, թե՞ ոչ: «Մենք աշխատում ենք այդ ուղղությամբ», – ասում են Վալդեբեբասում՝ գիտակցելով Դանիի վերադարձի կարևորությունը, բայց չշտապելով, որպեսզի խուսափեն հետագա բարդություններից: