«Le Monde» պարբերականը հաստատում է, որ ոստիկանը ենթարկվել է կարգապահական տույժի՝ ժամկետից շուտ թոշակի ուղարկվելով, Ֆրանսիայի ֆուտբոլի ֆեդերացիայի (FFF) հետ իր աշխատանքի դիմաց վճարումներ ստանալու պատճառով։

Ոստիկաններից մեկը, որը Կիլիան Մբապեից նվիրատվություն էր ստացել 2022 թվականի աշխարհի առաջնության ժամանակ Ֆրանսիայի հավաքականի պաշտպանությունն ապահովելու համար, պատժվել է պարտադիր վաղաժամկետ թոշակի անցմամբ։

Այնուամենայնիվ, օրաթերթը հստակեցրել է, որ 57-ամյա այս ոստիկանը, ով հայտնի է «Մոմո» անունով և արդեն 21 տարի համագործակցում է Ֆրանսիայի ֆուտբոլի ֆեդերացիայի հետ, ներկա կլինի 2026 թվականի աշխարհի առաջնության անվտանգության թիմում, սակայն այս անգամ՝ մինչև հուլիսի վերջ կնքված ժամանակավոր պայմանագրով։ Ըստ հրապարակման՝ նա Մբապեից ստացել է 60․300 եվրո։

Ներքին հետաքննություն և պատիժ

Ազգային ոստիկանության գլխավոր տեսչությունը (IGPN) ներքին հետաքննություն էր սկսել գործակալներին կատարված վճարումների վերաբերյալ, որոնց մեղադրում էին «հավատարմության», «պարկեշտության» պակասի և հաշվետվողականություն չցուցաբերելու մեջ։

Հետաքննությունից հետո ոստիկանության ղեկավարությունը որոշել է դեկտեմբերի 20-ին նրան ուղարկել վաղաժամկետ թոշակի։ Թեև սա կրում է խորհրդանշական բնույթ (քանի որ ոստիկանը պատրաստվում էր թոշակի անցնել ընդամենը 10 օր անց), այնուամենայնիվ, սա ամենախիստ պատիժն է նախքան ուղղակի հեռացումը։ Ֆրանսիայի ազգային ոստիկանությունում նման միջոցի դիմում են եզակի դեպքերում (տարեկան 10-ից պակաս դեպք ողջ երկրում)։

Զուգահեռաբար, այս հրամանատարը և ևս չորս ոստիկան գտնվում են Ֆրանսիայի արդարադատության ուշադրության կենտրոնում՝ Մբապեի կողմից նրանց փոխանցված ընդհանուր 180,300 եվրոյի պատճառով։

Մբապեի դիրքորոշումը

Ըստ «Le Canard Enchaîné» շաբաթաթերթի հուլիսյան հրապարակման՝ նվիրատվություններն անելուց առաջ Մբապեն խորհրդակցել էր իր հարկային իրավաբանի հետ, ով նշել էր, որ այդ գումարները հարկային հայտարարագրման ենթակա չեն։

Մադրիդի «Ռեալի» ներկայիս հարձակվողը Ֆրանսիայի ֆուտբոլի ֆեդերացիայից ստացել էր 500․000 եվրո պարգևավճար՝ աշխարհի առաջնությունում երկրորդ տեղը զբաղեցնելու համար (Արգենտինային պարտվելուց հետո)։ Նա պարզաբանել էր, որ որոշել է ողջ գումարը նվիրաբերել տարբեր հասարակական կազմակերպությունների, ինչպես նաև ոստիկանական թիմի անդամներին, ովքեր պաշտպանում էին խաղացողներին։